終於去完北京返黎喇，呢次旅行真係令我大開眼界，中國六大世界文化遺產我都已經去左四個，長城(做左好漢)、故宮、天壇同頤和園，當然仲有天安門、鳥巢、水立方、首都博物館、王府井、南鑼鼓巷、國家大劇院(巨蛋)、景山公園，其餘就一D茶館、絲綢廠、北京同仁堂(大宅門)、玉石廠同埋一間08年奧運會果時專為國家級運動員做按摩既館做呢個腳底按摩！

加上天氣真係好過香港，涼涼地，有風，就算熱得黎都唔會話點出汗，可以話乾爽，天氣算幾好，依家Post下D相先！

長城

(好高，好佩服以前D人點可以起到出黎，真係「血肉長城」，肯定好辛苦！而且D梯級同梯級之間既距離都幾高，要大大步行上去，越行越高，越高越驚，唔敢望落去，行上去好驚驚地，行落仲慘，仲驚，一路落一路腳震！不過我總算做左好漢，正所謂：「不到長城非好漢」嘛！)

頤和園

(大到無論，好似話係故宮既四倍，故宮已經好大，佢仲要四倍，所以跟本行唔晒，所以係果度都係行左一部分！頤和園係當時慈禧太后最鍾意既地方，佢好多時都係度住，係度欣賞風景，但個地方咁大，佢用左幾多個時間去欣賞得晒，行得晒呢？)

天壇

(係皇帝祭祀既地方，好似話天壇個範圍都係大過故宮！終於見到中國既「天圓地方」設計。)

故宮

(當然係皇帝住既地方，上朝既地方啦！入面參觀左以前皇后住既「坤寧宮」、皇帝上朝既地方「乾清宮」、「軍機處」同埋以前考科舉既試場！但呢D只係都唔知有無四分之一，所以故宮真係大到行唔晒！所以我明白點解以前有D大臣唔上朝喇，因為故宮咁大，要行去乾清宮真係行到腳斷都未行到過去，哈！仲要無得騎馬，除非果個大臣已經係年過六十五歲或以上，或者皇帝特別批准，就好似"和坤"咁，佢就可以騎住馬去上朝咁先無咁辛苦，如果唔係就行都行死你！)

天安門

(呢個更加唔使點講，見到大大幅"毛主席"既掛象，仲有一個"中國人民紀念碑"。都係故宮附近，係好近好近！)

王府井

(以前臣子住既地方，好多四合院，亦都好近故宮，方便D臣子入宮。依家就變左一個好旺好多人既地方，好似香港既旺角或者銅鑼灣咁，有好多野買好多野食，仲第一次見到一串串既"炸蠍子"、"炸蠶蛹"、"炸草蜢"、"炸蚯蚓"、"炸海星"，勁恐怖，見到就唔敢食，見到有D蠍子唔係炸既，仲係「活生生」咁比枝牙櫼串住，仲識郁架，好嘔呀救命！)

景山公園

(主要睇"明思宗"果時逃亡而吊頸自盡既地方！)

首都博物館

(呢個我最鍾意，因我好鍾意古代既野，入面有好多，仲見到"大金"既"元顏阿骨打"既石官，有兩個，一個係佢一個係佢老婆既！另外仲有好多唔同既野，有書畫、青銅器、青花瓷同一D玉器！而且呢個博物館都係跟據中國既風水學「天圓地方」黎建築既！)

國家大劇院

(其實無乜野睇，主要睇佢既外觀，好似隻好大既蛋咁，所以有「巨蛋」之稱。)

南鑼鼓巷

(以前係一D「胡同」黎，依家都係，不過依家變成左酒吧街，好多酒吧，好多外國人黎飲酒，好似蘭貴坊咁！)

鳥巢&水立方

(呢兩座係為左08年北京奧運已起既，去到真係覺得好靚，我個人就鍾意鳥巢多D，好多條鋼筋包圍住個運動場，不過係個外觀特別，入到去同一D標准運動場無咩大分別，要比50蚊入去架！之外我仲買既個"08北京奧運"既金牌，不過係A貨，哈，真既金牌當然無得買啦！因為當時我第一次見到呢個"08北京奧運"金牌既時候就已經愛上左佢，覺得佢既設計好有中國既特色，我覺得係咁多屆奧運會之中最靚最有特色既，無論係金銀銅牌都好，每一塊都有一塊代表到中國既玉，簡體字都睇到，中國個"國"字，一個口包住一個玉字，所以由此證明玉係代表到中國！)

其他

(下面得一幅相，呢件就係好出名既............"金褸玉衣"喇！)

今日20歲生日，又大一歲，人年第一個二字頭既生日！講返尋日同今日做過D咩啦！

尋日同D fd去左旺角唱K兼睇戲食飯，食完飯都就黎12點，佢地話要過左12點，同我講埋句生日快樂先比我返屋企，跟住仲要係條街度唱HappyBirthday，但旺角12點幾仲好旺架嘛，係條街同唱HappyBirthday真係...........唔知點講，不過真係幾開心既！跟住就返屋企訓覺lu！ P.S.多謝阿Hei份禮物！

今日聖堂就有個活動，就係同南亞裔人士一齊去呢個大埔既「樹屋田莊」BBQ，同埋玩下遊戲咁！佢地都有同我慶祝，雖然個蛋糕就.....但講真，真係未試過有廿幾個唔同國藉既人同我唱HappyBirthday，就算廿幾個香港人都未試過，所以都真係好開心既！Andthen夜晚就同左屋企人去食飯，食完就返屋企切返個正正式式既蛋糕！

20歲呢個生日，真係我人生中暫時最開心既生日，多謝同我慶祝既各位人士！

眼見時下既娛樂新聞、雜誌都係同果D「o靚模」有關，事旦總會有一篇！果D咁既「o靚模」拍過下廣告，照過下硬照就話係Model？賣弄身材，D布越少就越好！依家呢D所謂model簡直係泛濫，多到唔知邊個打邊個，點解可以咁既呢？又唔係高，矮到咩咁都叫Model......好喇，賣弄完身材之後又比人篤爆話佢個胸係假，果度整過呢度整過，當然真定假就要佢自己先知，但就係因為依家太多呢D所謂Model，大家針鋒相對，你話下我，我話下你，你篤爆我，我篤爆你，簡直不知所謂！究竟呢D係咩風氣呢？

我雖然係男仔，但我都對佢地無乜好感，無一個睇得上眼！皆因佢地實在太過賣弄，呢個又出寫真，果個又出寫真，搞到D寫真好似咸書咁，但我自己個人覺得果D寫真其實應該唔可以叫寫真，應該叫純影集。

因為我自己覺得寫真的定義係將自己真實生活的一面，透過圖片去表達，好像平時做緊野、食緊野等等，唔係刻意咁擺定一個pose去畀個攝影師去影，亦沒有任何指定既服裝同埋地點，所有都係隨意既，係好free既，而且人物可以唔只集中一個人，可以有好多個人。

而純影集就是係左某一個主題而去專登拍攝既，有指定既服裝，例如泳裝、晚裝果D咁，係有指定pose同地點，人物亦大多集中於一個人。

所以寫真唔係咸書，但遲早就會比佢地歪曲晒！我反對佢地入書展，但唔該著返多D衫，唔好成班著晒D三點式去做宣傳，始終書展係一個有小朋友去既地方，如果比小朋友見到就唔好啦！賣弄身材唔係個個男性都會接受，唔係個個男性都鍾意胸大既女性，著咁少布無非都係著比男性睇，斷估唔會著比女性睇，搞到成班電車男、麻甩佬兼咸濕佬係度圍觀，唉，道德淪亡！

子曰:「非禮勿視,非禮勿聽,非禮勿言,非禮勿動。 」.

嘩！又成個月無打咁滯，懶打耶！

今日終於完成我要補考既project，可以叫做鬆晒，真係可以抖下喇！我發覺今日暑假無乜好戲睇，得《Harry Potter and the Half-blood Prince》

我終於尋日睇左喇，我覺得呢集比起之前5集好睇左，當然都有人唔係咁好睇，因為太多野講，的確成套戲比之前既係多左野講，但我覺得就係因為咁而交代得詳細一D，而且今集榮恩真係逢係佢出親場果時都有gag位，好搞笑，多左好多笑位！不過有一part講妙麗見到榮恩被女咀果時呷醋，走左去喊，之後哈利就走去借個膊頭比佢喊呢幕，我真係覺得佢地兩個先係襯架嘛，妙麗同榮恩都唔太襯，一個叻女配一個傻更更既榮恩........！

其實成套戲都無講過"the Half-blood Prince"，係石內卜後尾同哈利講佢係"the Half-blood Prince"，就係咁多，咁點解今集個名改做《Harry Potter and the Half-blood Prince》呢？真係有D唔明！就係要等第七集先講石內卜點解係"the Half-blood Prince"！

整體黎講成套戲係幾好笑，當然最尾校長比石內卜一招KO左之後個氣氛完全唔同晒，Down晒，但的確好睇過之前果5集，希望第七集快D上映啦，雖然第七集分開上下集上映，但我點都會比錢入戲院睇，好期待！

成兩個月無打咁滯！其實都算忙，博殺期嘛！不過依家都博完，放緊假，仲未搵到暑假工做，其實我做唔做都無乜所謂既！

依家幫緊聖堂搞緊神父晉鐸金禧紀念既野，先到搞掂個襟章，依家就搞緊個簽名banner！

果個襟章可以係話我人生第一個design去到外國，即係話我design既呢個襟章有機會去到意大利，哈，雖然唔係D咩威水野，但的確幾開心！呢個襟章當然係為左"神父晉鐸金禧紀念"而去造，其實今日已經搞掂左，送左返去聖堂，所以黎緊星期日就會派，到時每個教友都會有一個，而且神父襯住呢個暑假，佢都返一返佢鄉下意大利探下佢D親朋戚友，順便帶100個襟章過去，咁即係話我既襟章可以去到意大利，所以幾開心架！

講下第二件事，我發覺我對一個人有好感，但應該未至於係鍾意掛？真係唔知！不過我成日心諗，人地個條件都唔差，點會鍾意我呢個肥仔呀，算吧啦！...................唉，有時我真係覺得自己好犯賤，話減肥話足幾個月都係講一套做一套，幾時先認真去減呀？再唔減呢一世無女仔鍾意架喇！本身我自己要求都算高，但皆因我係肥仔，講得難聽D無資格咁高要求！